“കോക്രോച്ച് ജനത പാർട്ടി”: യുവജന രോഷത്തിന്റെ ചിഹ്നമായ വൈറൽ ട്രെൻഡ്

സോഷ്യൽ മീഡിയ ലോകത്തെ കഴിഞ്ഞ കുറച്ച് ദിവസങ്ങളായി കീഴടക്കിയ ഒരു പേരാണ് “കോക്രോച്ച് ജനത പാർട്ടി” അഥവാ CJP. ആദ്യമായി കേൾക്കുമ്പോൾ തമാശപോലെ തോന്നുന്ന ഈ പേര് ഇന്ന് ഇന്ത്യയിലെ യുവജനങ്ങളുടെ അസന്തോഷവും രാഷ്ട്രീയ നിരാശയും ഡിജിറ്റൽ പ്രതിഷേധവുമെല്ലാം ചേർന്നൊരു വലിയ ചർച്ചാവിഷയമായി മാറിയിരിക്കുകയാണ്. ഔദ്യോഗിക രാഷ്ട്രീയ പാർട്ടിയല്ലെങ്കിലും, മീമുകളും റീലുകളും വഴിയൊരുങ്ങിയ ഈ സാറ്റയർ പ്രസ്ഥാനം Gen Z തലമുറയുടെ പുതിയ പ്രതിഷേധഭാഷയായി മാറുകയാണ്. “എത്ര തവണ തള്ളിയാലും വീണ്ടും തിരികെയെത്തുന്ന ജീവി” എന്ന രീതിയിൽ കോക്രോച്ചിനെ ഒരു പ്രതീകമാക്കി, അവഗണിക്കപ്പെടുന്ന യുവജനങ്ങളുടെ ജീവിതസമരവും തൊഴിലില്ലായ്മയും രാഷ്ട്രീയ വ്യവസ്ഥയോടുള്ള നിരാശയും ഈ ട്രെൻഡ് തുറന്നുകാട്ടുന്നു. ഒരു വിവാദ പരാമർശത്തെ തുടർന്ന് സോഷ്യൽ മീഡിയയിൽ ആരംഭിച്ച മീം തരംഗമാണ് പിന്നീട് “കോക്രോച്ച് ജനത പാർട്ടി” എന്ന പേരിൽ പൊട്ടിത്തെറിച്ചത്. Instagram Reels, YouTube Shorts, Facebook മീം പേജുകൾ, X പോസ്റ്റുകൾ എന്നിവയിലൂടെ AI പ്രസംഗങ്ങൾ, വ്യാജ തിരഞ്ഞെടുപ്പ് പോസ്റ്ററുകൾ, സിനിമാറ്റിക് എഡിറ്റുകൾ, “Voice of the Unemployed” പോലുള്ള ടാഗ്‌ലൈനുകൾ വൈറലായി. അതിലൂടെ തമാശയ്ക്ക് പിന്നിലെ യാഥാർത്ഥ്യങ്ങൾ കൂടുതൽ ശക്തമായി യുവജനങ്ങളിൽ എത്തി. ഉയരുന്ന ജീവിതച്ചെലവ്, തൊഴിൽ അവസരങ്ങളുടെ കുറവ്, രാഷ്ട്രീയ അവിശ്വാസം, “നമ്മളെ ആരും കേൾക്കുന്നില്ല” എന്ന തോന്നൽ — ഇവയൊക്കെയാണ് ഈ ട്രെൻഡിന്റെ അടിത്തറ. പഴയ തലമുറ തെരുവുകളിൽ പ്രതിഷേധിച്ചപ്പോൾ, ഇന്നത്തെ യുവതലമുറ മീമുകളിലും വൈറൽ വീഡിയോകളിലും സ്വന്തം ശബ്ദം കണ്ടെത്തുകയാണ്. ബോസ്റ്റൺ സർവകലാശാലയിലെ പബ്ലിക് റിലേഷൻസ് വിദ്യാർഥിയും മുൻപ് ആം ആദ്മി പാർട്ടിയുടെ സോഷ്യൽ മീഡിയ സ്ട്രറ്റീജിസ്റ്റുമായിരുന്ന 30കാരൻ അഭിജീത് ദിപ്കെ മെയ് 16-നാണ് ഈ ഓൺലൈൻ പ്രസ്ഥാനത്തിന് തുടക്കം കുറിച്ചത്. തൊഴിലില്ലാത്ത യുവാക്കളെയും സോഷ്യൽ മീഡിയ ആക്ടിവിസ്റ്റുകളെയും "സമൂഹത്തിലെ പ്രാണികളോടും പാറ്റകളോടും" ഉപമിച്ചുകൊണ്ട് സുപ്രീം കോടതി ചീഫ് ജസ്റ്റിസ് സൂര്യകാന്ത് നടത്തിയതായി പറയപ്പെടുന്ന ചില കോടതി പരാമർശങ്ങൾക്കെതിരെയുള്ള ഡിജിറ്റൽ പ്രതിഷേധമായാണ് ഈ കൂട്ടായ്മ ജന്മമെടുത്തത്. യുവജനങ്ങൾക്കിടയിൽ അതിവേഗം ജനപ്രീതി നേടുകയും വലിയ രാഷ്ട്രീയ ചർച്ചകൾക്ക് വഴിതുറക്കുകയും ചെയ്ത രാഷ്ട്രീയ കൂട്ടായ്മയായി ഇതു മാറി.