രാത്രി 12 കഴിഞ്ഞാൽ സോഷ്യൽ മീഡിയ ‘നിശ്ശബ്ദം’; കൗമാരക്കാരെ ഉറക്കത്തിലേക്ക് തിരിച്ചുവിടാൻ പുതിയ നീക്കം. സ്ക്രീനിൽ അവസാനമായി തെളിയുന്ന സമയം രാത്രി 12 മണി... പിന്നെ പുലർച്ചെ 6 വരെ ഇൻസ്റ്റാഗ്രാമും ഫേസ്ബുക്കും ‘അടച്ചിടും’. കൗമാരക്കാരുടെ രാത്രികാല സോഷ്യൽ മീഡിയ ഉപയോഗം നിയന്ത്രിക്കാൻ മെറ്റ മുന്നോട്ടുവയ്ക്കുന്ന പുതിയ സുരക്ഷാ നടപടികളാണ് ഇപ്പോൾ ശ്രദ്ധ നേടുന്നത്.
രാത്രിയിൽ കിടക്കയിൽ കയറിയ ശേഷവും ഫോൺ കൈവിടാത്ത കുട്ടികളും യുവാക്കളും ഇന്ന് സാധാരണ കാഴ്ചയാണ്. ഒരു റീൽ, പിന്നെ മറ്റൊന്ന്... ഒരു മെസേജ്, അതിന് പിന്നാലെ മറ്റൊരു നോട്ടിഫിക്കേഷൻ. സമയം പോകുന്നത് അറിയാതെ മണിക്കൂറുകൾ സ്ക്രീനിന് മുന്നിൽ ചെലവഴിക്കുന്ന ശീലം ഉറക്കത്തെയും പഠനത്തെയും മാനസികാരോഗ്യത്തെയും ബാധിക്കുമെന്ന ആശങ്കകൾക്കിടയിലാണ് പുതിയ നിയന്ത്രണങ്ങൾ എത്തുന്നത്.
12 മുതൽ 6 വരെ സോഷ്യൽ മീഡിയയ്ക്ക് ‘നൈറ്റ് ബ്രേക്ക്’
നിർദിഷ്ട പുതിയ ക്രമീകരണം പ്രകാരം, പ്രാദേശിക സമയം രാത്രി 12 മുതൽ പുലർച്ചെ 6 വരെ കൗമാരക്കാരുടെ ഇൻസ്റ്റാഗ്രാം, ഫേസ്ബുക്ക് അക്കൗണ്ടുകളുടെ ഉപയോഗം നിയന്ത്രിക്കാനാണ് നീക്കം. അതായത്, അർധരാത്രിക്ക് ശേഷമുള്ള മണിക്കൂറുകളിൽ സോഷ്യൽ മീഡിയയിൽ നിന്ന് മാറിനിൽക്കാൻ കൗമാരക്കാരെ നിർബന്ധിതരാക്കുന്ന തരത്തിലുള്ള സംവിധാനമായിരിക്കും ഇത്. രാത്രി വൈകിയും റീലുകളും വീഡിയോകളും കാണുന്നതിലൂടെ ഉറക്കസമയം നഷ്ടപ്പെടുന്ന സാഹചര്യം കുറയ്ക്കുകയാണ് പ്രധാന ലക്ഷ്യം.
രണ്ട് മണിക്കൂർ... അത്രയുമോ?
രാത്രികാല നിയന്ത്രണത്തിന് പുറമെ പ്രതിദിന സോഷ്യൽ മീഡിയ ഉപയോഗത്തിനും പരിധി നിർദേശിച്ചിട്ടുണ്ട്. ഇൻസ്റ്റാഗ്രാമും ഫേസ്ബുക്കും ചേർന്ന് ദിവസത്തിൽ രണ്ട് മണിക്കൂർ വരെ ഉപയോഗിക്കാവുന്ന തരത്തിലുള്ള ഡിഫോൾട്ട് സ്ക്രീൻ ടൈം പരിധിയാണ് നിർദേശിച്ചിരിക്കുന്നത്.
ഉപയോഗം തുടരുമ്പോൾ മുന്നറിയിപ്പുകളും ഇടവേള എടുക്കാനുള്ള ഓർമ്മപ്പെടുത്തലുകളും ലഭിക്കും. തുടർച്ചയായ സ്ക്രോളിങ്ങിന് പകരം ഇടയ്ക്കിടെ ഫോൺ മാറ്റിവയ്ക്കാൻ പ്രേരിപ്പിക്കുകയാണ് ലക്ഷ്യം.
നോട്ടിഫിക്കേഷനും ഇനി സൂക്ഷിച്ച്
സോഷ്യൽ മീഡിയ ഉപയോഗം വർധിപ്പിക്കുന്നതിൽ നോട്ടിഫിക്കേഷനുകൾക്കും വലിയ പങ്കുണ്ട്. ഒരു മെസേജ്, ഒരു ലൈക്ക്, ഒരു കമന്റ്... ഓരോ അറിയിപ്പും വീണ്ടും ആപ്പ് തുറക്കാനുള്ള പ്രേരണയാകാം.
കൗമാരക്കാരുടെ ശ്രദ്ധ തിരിച്ചുവിടുന്ന ഇത്തരം നോട്ടിഫിക്കേഷനുകളിൽ നിയന്ത്രണം കൊണ്ടുവരാനും പുതിയ നിർദേശത്തിലുണ്ട്.
പ്രായം മറച്ചുവെച്ച് സോഷ്യൽ മീഡിയയിൽ എത്തുന്നവർക്ക് തടയിടും
കുട്ടികൾക്ക് സോഷ്യൽ മീഡിയ ഉപയോഗിക്കുന്നതിനുള്ള പ്രായപരിധി മറികടക്കാൻ വ്യാജ ജനനത്തീയതി നൽകുന്നത് പുതിയ കാര്യമല്ല. ഇത് തടയാൻ കൂടുതൽ ശക്തമായ പ്രായപരിശോധന സംവിധാനങ്ങൾ കൊണ്ടുവരാനും നീക്കമുണ്ട്. 13 വയസ്സിന് താഴെയുള്ള കുട്ടികൾക്ക് അക്കൗണ്ട് തുറക്കുന്നത് തടയുന്നതിനുള്ള നടപടികളും ഇതിന്റെ ഭാഗമാണ്.
റീലുകളുടെ ലോകത്ത് ‘ലൈക്ക്’ പോലും നിയന്ത്രിക്കും
കൗമാരക്കാരുടെ മാനസിക സമ്മർദം കുറയ്ക്കുന്നതിനായി സോഷ്യൽ മീഡിയയിലെ ചില ഫീച്ചറുകളിലും മാറ്റങ്ങൾ നിർദേശിച്ചിട്ടുണ്ട്. കൗമാരക്കാർ കാണുന്ന പോസ്റ്റുകളിലെ ലൈക്കുകളുടെയും റിയാക്ഷനുകളുടെയും എണ്ണം മറയ്ക്കുന്ന സംവിധാനവും ഇതിൽ ഉൾപ്പെടുന്നു. മറ്റുള്ളവരുമായി നിരന്തരം താരതമ്യം ചെയ്യുന്നതും കൂടുതൽ ലൈക്കുകൾ നേടാനുള്ള സമ്മർദവും കുറയ്ക്കുകയാണ് ഇതിലൂടെ ലക്ഷ്യമിടുന്നത്.
മാതാപിതാക്കൾക്കും കൂടുതൽ നിയന്ത്രണം
കുട്ടികൾ സോഷ്യൽ മീഡിയയിൽ എന്താണ് ചെയ്യുന്നത് എന്നറിയാൻ മാതാപിതാക്കൾക്ക് കൂടുതൽ നിയന്ത്രണങ്ങളും വിവരങ്ങളും ലഭിക്കുന്ന തരത്തിലുള്ള സംവിധാനങ്ങളും ശക്തമാക്കും. കുട്ടികളുടെ ഓൺലൈൻ ലോകത്തെ പൂർണമായി നിരോധിക്കുന്നതിന് പകരം, സുരക്ഷിതമായ ഉപയോഗത്തിലേക്ക് നയിക്കുകയാണ് ലക്ഷ്യം.
ഫോൺ താഴെ വയ്ക്കുന്നൊരു തലമുറയാകുമോ?
സോഷ്യൽ മീഡിയ ഇന്ന് കുട്ടികളുടെ ജീവിതത്തിന്റെ ഭാഗമാണ്. പഠനം മുതൽ സൗഹൃദങ്ങൾ വരെ പലതും ഡിജിറ്റൽ ലോകത്താണ്. അതുകൊണ്ടുതന്നെ പൂർണ നിരോധനം പ്രായോഗികമല്ല. എന്നാൽ ‘എത്ര സമയം ഉപയോഗിക്കണം?’ ‘എപ്പോൾ ഉപയോഗിക്കരുത്?’ എന്നതിന് ഒരു പരിധി വേണമെന്ന ചർച്ച ശക്തമാകുകയാണ്.
രാത്രി 12ന് ശേഷം തെളിയുന്ന ഫോൺ സ്ക്രീനുകൾക്ക് പകരം ഉറക്കത്തിലേക്ക് മടങ്ങുന്ന കുട്ടികൾ... തുടർച്ചയായ സ്ക്രോളിങ്ങിന് പകരം കുടുംബത്തോടൊപ്പം ചെലവഴിക്കുന്ന സമയം... സോഷ്യൽ മീഡിയയുടെ നിയന്ത്രണങ്ങൾ ലക്ഷ്യമിടുന്നത് ഒടുവിൽ അതിലേക്കാണ്.
സാങ്കേതികവിദ്യയെ പൂർണമായി ഒഴിവാക്കുകയല്ല; അതിനെ നിയന്ത്രിച്ച് ഉപയോഗിക്കാൻ പഠിപ്പിക്കുകയാണ് പുതിയ കാലത്തിന്റെ വെല്ലുവിളി.
ഈ നിയന്ത്രണങ്ങൾ അമേരിക്കയിലെ നിർദിഷ്ട ഒത്തുതീർപ്പിന്റെ ഭാഗമാണ്. ഇന്ത്യയിലെ ഇൻസ്റ്റാഗ്രാം, ഫേസ്ബുക്ക് ഉപയോക്താക്കൾക്ക് രാത്രി 12 മുതൽ രാവിലെ 6 വരെ ഉപയോഗം സ്വമേധയാ ബ്ലോക്ക് ചെയ്യുന്ന പുതിയ പൊതുനിയമം നിലവിൽ വന്നുവെന്ന അർത്ഥത്തിൽ ഇത് കാണരുത്.