പാറ്റകൾ ഇനി രക്ഷകരാകും, മനുഷ്യർക്ക് എത്തിച്ചേരാൻ പ്രയാസമുള്ള ഇടങ്ങളിൽ ജീവന്റെ സൂചനകൾ തേടി ഇനി സഞ്ചരിക്കുക ചെറുപാറ്റകളായിരിക്കും. ഭൂകമ്പം, മണ്ണിടിച്ചിൽ, വെള്ളപ്പൊക്കം തുടങ്ങിയ ദുരന്തങ്ങളിൽ അവശിഷ്ടങ്ങൾക്കിടയിലും വെള്ളത്തിനടിയിലും കുടുങ്ങിക്കിടക്കുന്നവരെ കണ്ടെത്താൻ സഹായിക്കുന്ന സൈബോർഗ് പാറ്റകളെ വികസിപ്പിച്ചിരിക്കുകയാണ് ശാസ്ത്രജ്ഞർ. ജീവശാസ്ത്രവും റോബോട്ടിക്സും സംയോജിപ്പിച്ച ഈ പുതിയ സാങ്കേതികവിദ്യ ഭാവിയിലെ രക്ഷാപ്രവർത്തനങ്ങളിൽ നിർണായക മാറ്റമുണ്ടാക്കുമെന്നാണ് വിലയിരുത്തൽ.
സിംഗപ്പൂരിലെ നന്യാങ് ടെക്നോളജിക്കൽ യൂണിവേഴ്സിറ്റിയിലെ എഞ്ചിനീയർ ഹിരോടാക സറ്റോയുടെ നേതൃത്വത്തിലുള്ള ഗവേഷക സംഘമാണ് ഈ സാങ്കേതികവിദ്യ വികസിപ്പിച്ചത്. വെള്ളത്തിനടിയിലൂടെ സഞ്ചരിക്കാനും അതിനുശേഷം കരയിലേക്ക് തിരിച്ചെത്തി ദൗത്യം തുടരാനും കഴിയുന്ന പ്രത്യേക 3ഡി പ്രിന്റ് ചെയ്ത ഡൈവിംഗ് സ്യൂട്ടുകളാണ് ഈ പാറ്റകൾക്കായി രൂപകൽപ്പന ചെയ്തിരിക്കുന്നത്.
ജീവനുള്ള പാറ്റകൾ തന്നെ 'റോബോട്ടുകൾ'
പൂർണമായും യന്ത്രറോബോട്ടുകൾ നിർമ്മിക്കുന്നതിന് പകരം ജീവനുള്ള പാറ്റകളുടെ ശരീരത്തിൽ ചെറിയ ഇലക്ട്രോണിക് ബാക്ക്പാക്കും വയർലെസ് നിയന്ത്രണ സംവിധാനവും ഘടിപ്പിച്ചാണ് സൈബോർഗ് പാറ്റകളെ സൃഷ്ടിക്കുന്നത്. പാറ്റയുടെ നാഡീവ്യൂഹത്തിലേക്ക് സൂക്ഷ്മമായ വൈദ്യുത സിഗ്നലുകൾ അയച്ചുകൊണ്ട് അതിന്റെ സഞ്ചാരദിശ ഗവേഷകർക്ക് നിയന്ത്രിക്കാനാകും.
ജീവനുള്ള പാറ്റകളുടെ സ്വാഭാവിക ചലനശേഷിയും സന്തുലിതാവസ്ഥയും ഉപയോഗിക്കുന്നതിനാൽ പരമ്പരാഗത ചെറുറോബോട്ടുകളെ അപേക്ഷിച്ച് വളരെ കുറഞ്ഞ കമ്പ്യൂട്ടിങ് ശേഷിയും ഊർജവും മാത്രമേ ഇതിന് ആവശ്യമായുള്ളു. അതുകൊണ്ടുതന്നെ ദൈർഘ്യമേറിയ രക്ഷാദൗത്യങ്ങളിലും ഇവ കൂടുതൽ ഫലപ്രദമാകുമെന്നാണ് ഗവേഷകർ പറയുന്നത്.
വെള്ളത്തിനടിയിലും അതേ വേഗത്തിൽ
പാറ്റകൾക്കായി വികസിപ്പിച്ചെടുത്ത 3ഡി ഡൈവിംഗ് സ്യൂട്ടുകൾ അവയെ വെള്ളത്തിനടിയിൽ സ്ഥിരതയോടെ സഞ്ചരിക്കാൻ സഹായിക്കുന്നു. സാധാരണ പാറ്റകൾക്ക് വെള്ളത്തിന്റെ ഉപരിതലത്തിൽ മാത്രമേ എളുപ്പത്തിൽ ചലിക്കാൻ കഴിയൂ. എന്നാൽ പുതിയ സ്യൂട്ടിന്റെ സഹായത്തോടെ വെള്ളത്തിനടിയിലേക്ക് മുങ്ങുകയും നിയന്ത്രിതമായി നീങ്ങുകയും വീണ്ടും ഉപരിതലത്തിലേക്ക് മടങ്ങിയെത്തുകയും ചെയ്യാൻ ഇവയ്ക്ക് കഴിയും.മണ്ണിടിച്ചിലുകളിൽ രൂപപ്പെടുന്ന ഇടുങ്ങിയ വിടവുകൾ, തകർന്ന കെട്ടിടങ്ങളുടെ അവശിഷ്ടങ്ങൾ, വെള്ളം നിറഞ്ഞ അടിത്തറകൾ തുടങ്ങിയ മനുഷ്യർക്കോ വലിയ റോബോട്ടുകൾക്കോ എത്തിപ്പെടാൻ പ്രയാസമുള്ള സ്ഥലങ്ങളിൽ ഇവയെ വിന്യസിക്കാനാണ് ലക്ഷ്യമിടുന്നത്.
രക്ഷാപ്രവർത്തനത്തിന് പുതിയ പ്രതീക്ഷ
ഭാവിയിൽ ഈ സൈബോർഗ് പാറ്റകളിൽ ചെറുകിട ക്യാമറകൾ, താപനില സെൻസറുകൾ, വാതകചോർച്ച കണ്ടെത്തുന്ന ഉപകരണങ്ങൾ, കാർബൺ ഡൈ ഓക്സൈഡ് അളക്കുന്ന സെൻസറുകൾ എന്നിവ ഘടിപ്പിക്കാനുള്ള ശ്രമങ്ങളും പുരോഗമിക്കുകയാണ്. ഇതിലൂടെ ദുരന്താവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരുടെ സാന്നിധ്യം കൂടുതൽ കൃത്യമായി കണ്ടെത്താൻ കഴിയുമെന്നാണ് പ്രതീക്ഷ.
അതോടൊപ്പം വ്യാവസായിക അപകടങ്ങൾ, വിഷവാതക ചോർച്ചകൾ, ആണവ നിലയങ്ങളിലെ പരിശോധനകൾ തുടങ്ങിയ മനുഷ്യജീവന് അപകടസാധ്യതയുള്ള മേഖലകളിലും ഈ സാങ്കേതികവിദ്യ പ്രയോജനപ്പെടുത്താനാകുമെന്ന് ഗവേഷകർ വിലയിരുത്തുന്നു.
വെല്ലുവിളികളും ചർച്ചകളും
സാങ്കേതികവിദ്യ വലിയ പ്രതീക്ഷ നൽകുമ്പോഴും ജീവികളെ ഇത്തരം പരീക്ഷണങ്ങൾക്ക് ഉപയോഗിക്കുന്നതുമായി ബന്ധപ്പെട്ട ധാർമിക ചർച്ചകളും ഉയരുന്നുണ്ട്. ജീവികളുടെ ക്ഷേമം ഉറപ്പാക്കിയും ശാസ്ത്രീയ മാനദണ്ഡങ്ങൾ പാലിച്ചുമാത്രമേ ഇത്തരം ഗവേഷണങ്ങൾ മുന്നോട്ടുപോകാവൂ എന്ന നിലപാടും ശാസ്ത്രലോകത്ത് ശക്തമാണ്.
ഭാവിയിലേക്കുള്ള ചുവടുവെപ്പ്
കൃത്രിമബുദ്ധിയും ജൈവസാങ്കേതികവിദ്യയും കൈകോർക്കുന്ന പുതിയ കാലഘട്ടത്തിന്റെ ഉദാഹരണമാണ് സൈബോർഗ് പാറ്റകൾ. ദുരന്തഭൂമികളിൽ ഓരോ നിമിഷവും നിർണായകമായ സാഹചര്യങ്ങളിൽ മനുഷ്യജീവൻ രക്ഷിക്കാൻ ഈ ചെറുജീവികൾ വലിയ പങ്കുവഹിക്കുന്ന ദിനങ്ങൾ അത്ര വിദൂരമല്ലെന്നാണ് ശാസ്ത്രലോകത്തിന്റെ പ്രതീക്ഷ.