'പ്രഥമ ദൃഷ്ട്യാ കുറ്റക്കാർ' നിങ്ങളെ മുൾമുനയിൽ നിർത്തും

പാർവതി തിരുവോത്ത്, വിജയരാഘവൻ എന്നിവരെ കേന്ദ്രകഥാപാത്രങ്ങളാക്കി ഷഹദ് സംവിധാനം ചെയ്ത 'പ്രഥമ ദൃഷ്ട്യാ കുറ്റക്കാർ' മലയാളത്തിൽ സമീപകാലത്തിറങ്ങിയ ശ്രദ്ധേയമായ ഇൻവെസ്റ്റിഗേറ്റീവ് പ്രൊസീജ്യറൽ ത്രില്ലറുകളിൽ ഒന്നാണ്. തുടക്കം മുതൽ അവസാനം വരെ പ്രേക്ഷകരെ ഉദ്വേഗത്തിന്റെ മുൾമുനയിൽ നിർത്തുന്നതിനൊപ്പം വൈകാരികമായ ഒരു അടിത്തറ നിലനിർത്താനും ചിത്രത്തിന് കഴിയുന്നുണ്ട്. കേവലം ഒരു കുറ്റാന്വേഷണ കഥ എന്നതിനപ്പുറം, കാക്കിക്കുള്ളിലെ മനുഷ്യരുടെ സംഘർഷങ്ങളും സമ്മർദ്ദങ്ങളും പച്ചയായി ഒപ്പിയെടുക്കുന്നതിലാണ് സിനിമ വിജയിക്കുന്നത്. പാർവതി അവതരിപ്പിക്കുന്ന അലീന എന്ന കഥാപാത്രത്തിൽ നിന്നുമാണ് കഥ തുടങ്ങുന്നത്. സർവീസിലിരിക്കെ മരണപ്പെട്ടൊരു പൊലീസുകാരന്റെ വിധവയാണ് അലീന. അലീനയ്ക്ക് പൊലീസ് ഡിപ്പാർട്ട്‌മെന്റിൽ ആശ്രിതനിയമനം ലഭിക്കുന്നു. പലരും തെരഞ്ഞെടുക്കാൻ മടിക്കുന്ന ഫീൽഡ് ജോലി തന്നെ അലീന ചോദിച്ചുവാങ്ങുകയാണ്. ഒരു ക്ലറിക്കൽ ജോലിയുടെ സുരക്ഷിതത്വത്തിന് പകരം ഭർത്താവ് ധരിച്ച അതേ കാക്കി അന്തസ്സോടെ അണിയണമെന്ന അലീനയുടെ ഉറച്ച തീരുമാനം അവളെ ഒരു കോൺസ്റ്റബിളാക്കി മാറ്റുന്നു.