പാർസൽ ലോറിയിടിച്ച് പോസ്റ്റ് തകർന്നു; തുടർന്ന് പൈപ്പും പൊട്ടി: തലശേരിയിൽ വെള്ളവും വെളിച്ചവുമില്ലാതെ നാട്ടുകാർ വലഞ്ഞു
Author
news desk
Published
October 24, 2026

ശനിയാഴ്ച രാവിലെ ഒമ്പത് മണിയോടെയായിരുന്നു സംഭവങ്ങളുടെ തുടക്കം. നിറയെ സാധനങ്ങളുമായി പാർസൽ ഓഫീസിലേക്ക് വന്ന ലോറി നിയന്ത്രണം വിട്ട് പാതയരികിലെ വൈദ്യുതി പോസ്റ്റിലേക്ക് ഇടിച്ചുകയറുകയായിരുന്നു. അപകടത്തിൽ പോസ്റ്റ് പൂർണമായി തകരുകയും പ്രദേശത്തെ വൈദ്യുതി ബന്ധം തകരാറിലാകുകയും ചെയ്തു. വിവരമറിഞ്ഞ് സ്ഥലത്തെത്തിയ കെ.എസ്.ഇ.ബി ജീവനക്കാർ തകർന്ന പോസ്റ്റിന് പകരം പുതിയത് സ്ഥാപിക്കുന്നതിനായി ജെ.സി.ബി ഉപയോഗിച്ച് കുഴിയെടുക്കാൻ തുടങ്ങി. എന്നാൽ കുഴിയെടുക്കുന്നതിനിടയിൽ മണ്ണിനടിയിലൂടെ പോകുന്ന കുടിവെള്ള വിതരണ പൈപ്പ് അബദ്ധത്തിൽ തകരുകയായിരുന്നു. പൈപ്പ് പൊട്ടി വെള്ളം ശക്തിയായി റോഡിലേക്ക് ഒഴുകിപ്പടർന്നതോടെ പോസ്റ്റ് സ്ഥാപിക്കാനെത്തിയ ജീവനക്കാരുടെ ജോലിയും തടസ്സപ്പെട്ടു. ഇതോടെ പ്രദേശത്തേക്കുള്ള ശുദ്ധജല വിതരണവും പൂർണമായി നിലച്ചു. ഇടുങ്ങിയ റോഡിലുണ്ടായ ലോറി അപകടവും പൈപ്പ് തകർച്ചയെത്തുടർന്നുള്ള വെള്ളക്കെട്ടും കാരണം കസ്റ്റംസ് റോഡിലൂടെയുള്ള വാഹനഗതാഗതം ഏറെനേരം പൂർണമായി തടസ്സപ്പെട്ടു. വൈദ്യുതിയും കുടിവെള്ളവും മുടങ്ങിയതും ഗതാഗതം സ്തംഭിച്ചതും പ്രദേശവാസികളെ കടുത്ത ദുരിതത്തിലാക്കി. തുടർന്ന് ബന്ധപ്പെട്ട അധികൃതർ ഇടപെട്ട് ഉച്ചയോടെയാണ് തകരാറുകൾ പരിഹരിച്ച് സ്ഥിതിഗതികൾ സാധാരണ നിലയിലാക്കിയത്.