കുംഭമേളയിലൂടെ വൈറലായ പെൺകുട്ടിയുടെ ഭർത്താവ് ഫർമാൻ ഖാനെതിരെ പോലീസ് കേസെടുത്തു

തിരുവനന്തപുരം: സോഷ്യൽ മീഡിയയിൽ ഏറെ ചർച്ച ചെയ്യപ്പെട്ട പ്രണയവിവാഹത്തിന് പിന്നാലെ കുംഭമേളയിലൂടെ വൈറലായ പെൺകുട്ടിയുടെ ഭർത്താവ് ഫർമാൻ ഖാനെതിരെ പോലീസ് കേസെടുത്തു. വിവാഹസമയത്ത് പെൺകുട്ടിക്ക് പ്രായപൂർത്തിയായിരുന്നില്ലെന്ന് നാഷണൽ കമ്മീഷൻ ഫോർ ഷെഡ്യൂൾഡ് ട്രൈബ്സ് (NCST) നടത്തിയ അന്വേഷണത്തിൽ കണ്ടെത്തിയതിനെത്തുടർന്നാണ് നടപടി. മധ്യപ്രദേശിലെ ഖാർഗോൺ ജില്ലയിലെ മഹേശ്വർ പോലീസ് സ്റ്റേഷനിലാണ് ഫർമാൻ ഖാനെതിരെ പോക്സോ (POCSO) നിയമപ്രകാരം എഫ്.ഐ.ആർ രജിസ്റ്റർ ചെയ്തത്. ആശുപത്രി രേഖകൾ പ്രകാരം 2009 ഡിസംബർ 30-നാണ് പെൺകുട്ടി ജനിച്ചത്. 2026 മാർച്ച് 11-ന് കേരളത്തിൽ വെച്ച് വിവാഹം നടക്കുമ്പോൾ പെൺകുട്ടിക്ക് വെറും 16 വയസ്സ് മാത്രമായിരുന്നു പ്രായം. പ്രായപൂർത്തിയായെന്ന് കാണിക്കാൻ വ്യാജ ജനന സർട്ടിഫിക്കറ്റും മറ്റ് രേഖകളും പ്രതികൾ നിർമ്മിച്ചതായി അന്വേഷണ ഉദ്യോഗസ്ഥർ കണ്ടെത്തി. വിവാഹം നടന്ന ക്ഷേത്ര അധികൃതർക്ക് ദമ്പതികൾ നൽകിയത് വ്യാജ ആധാർ വിവരങ്ങളായിരുന്നുവെന്നും റിപ്പോർട്ടുകൾ സൂചിപ്പിക്കുന്നു. ഈ വ്യാജരേഖകൾ അടിയന്തരമായി റദ്ദാക്കാൻ അധികൃതർ ഉത്തരവിട്ടിട്ടുണ്ട്. ​ഇരുവരുടെയും വിവാഹം വലിയ രീതിയിൽ സോഷ്യൽ മീഡിയയിൽ ആഘോഷിക്കപ്പെട്ടിരുന്നു. എന്നാൽ നിയമപരമായ പ്രായമെത്തുന്നതിന് മുൻപുള്ള വിവാഹം കുറ്റകരമാണെന്നിരിക്കെ, പെൺകുട്ടിയുടെ സുരക്ഷയും അവകാശങ്ങളും മുൻനിർത്തിയാണ് കമ്മീഷൻ ഇടപെട്ടത്. പ്രായപൂർത്തിയാകാത്ത പെൺകുട്ടിയെ വിവാഹം കഴിച്ചതിനും വ്യാജരേഖകൾ ചമച്ചതിനും ഫർമാൻ ഖാൻ ഇനി ഗുരുതരമായ നിയമനടപടികൾ നേരിടേണ്ടി വരും.