ആഫ്രിക്കൻ വൻകരയെ വീണ്ടും ഭീതിയുടെ നിഴലിലാഴ്ത്തിക്കൊണ്ട് എബോള വൈറസ്

ആഫ്രിക്കൻ വൻകരയെ വീണ്ടും ഭീതിയുടെ നിഴലിലാഴ്ത്തിക്കൊണ്ട് ഡെമോക്രാറ്റിക് റിപ്പബ്ലിക് ഓഫ് കോംഗോയിലും ഉഗാണ്ടയിലും എബോള വൈറസിന്റെ അതിശക്തമായ തരംഗം ആഞ്ഞടിക്കുകയാണ്.ലോകമെമ്പാടുമുള്ള ആരോഗ്യ വിദഗ്ധരെ ഒന്നടങ്കം ഞെട്ടിച്ചുകൊണ്ട്, സാധാരണ കണ്ട് വരാറുള്ള 'സയർ', 'സുഡാൻ' വകഭേദങ്ങളെക്കാള്‍ മാരകവും നിഗൂഢവുമായ 'ബുണ്ടിബുഗ്യോ എബോളാവൈറസ്' എന്ന വകഭേദമാണ് ഇത്തവണ കടുത്ത നാശം വിതയ്ക്കുന്നത്. രോഗവ്യാപനത്തിന്റെ അതിവേഗത കണക്കിലെടുത്ത്, സാധാരണ ചർച്ചാ നടപടികള്‍ പോലും മറികടന്ന് ലോകാരോഗ്യ സംഘടന അതീവ അടിയന്തിരമായി 'അന്താരാഷ്ട്ര പൊതുജനാരോഗ്യ അടിയന്തരാവസ്ഥ' പ്രഖ്യാപിച്ചു കഴിഞ്ഞു. നിലവില്‍ ഈ വകഭേദത്തിനെതിരെ ഫലപ്രദമായ വാക്സിനുകളോ കൃത്യമായ പ്രതിരോധ മരുന്നുകളോ ലഭ്യമല്ല എന്ന യാഥാർഥ്യം ഈ ആഗോള ആരോഗ്യ പ്രതിസന്ധിയുടെ ആഴം വർധിപ്പിക്കുന്നു. രോഗകാരികളായ സൂക്ഷ്മാണുക്കളെ അവ കണ്ടെത്തുന്ന സ്ഥലങ്ങളുടെ പേരില്‍ നാമകരണം ചെയ്യുന്ന പഴയ ശൈലിയില്‍ നിന്നാണ് 'ബുണ്ടിബുഗ്യോ' എന്ന പേര് ഈ വൈറസിന് ലഭിക്കുന്നത്. 2007-ല്‍ പടിഞ്ഞാറൻ ഉഗാണ്ടയിലെ ബുണ്ടിബുഗ്യോ ജില്ലയില്‍ ഒരു നിഗൂഢ രോഗമായി പൊട്ടിപ്പുറപ്പെട്ടപ്പോഴാണ് ഈ വകഭേദം ചരിത്രത്തിലാദ്യമായി തിരിച്ചറിയപ്പെടുന്നത്. മുൻകാല ചരിത്രം പരിശോധിച്ചാല്‍ 30% മുതല്‍ 50% വരെയാണ് ഇതിന്റെ മരണനിരക്ക്. അതായത് രോഗം ബാധിക്കുന്ന പകുതിയോളം പേരും മരണത്തിന് കീഴടങ്ങുന്നു എന്നർഥം. നിലവില്‍ ആഭ്യന്തര യുദ്ധങ്ങളും കടുത്ത സംഘർഷങ്ങളും നിലനില്‍ക്കുന്ന അതിർത്തി പ്രദേശങ്ങളിലാണ് ഈ രോഗബാധ റിപ്പോർട്ട് ചെയ്യപ്പെട്ടിട്ടുള്ളത് എന്നത് പ്രതിരോധ പ്രവർത്തനങ്ങളെ കൂടുതല്‍ സങ്കീർണമാക്കുന്നു. രോഗബാധിതരെ കൃത്യമായി കണ്ടെത്തുന്നതിനും അവരുടെ സമ്പർക്കപ്പട്ടിക തയ്യാറാക്കുന്നതിനും ആരോഗ്യപ്രവർത്തകർ കടുത്ത വെല്ലുവിളികളാണ് നേരിടുന്നത്. മറ്റ് എബോള വകഭേദങ്ങള്‍ക്ക് സമാനമായി മനുഷ്യശരീരത്തെ തകർക്കുന്ന ലക്ഷണങ്ങളാണ് ബുണ്ടിബുഗ്യോ വൈറസ് ബാധയ്ക്കുള്ളത്. രോഗലക്ഷണങ്ങളെ പ്രധാനമായും രണ്ട് ഘട്ടങ്ങളായി തിരിക്കാം. രോഗബാധയുടെ പ്രാരംഭ ഘട്ടത്തെ 'ഡ്രൈ സിംപ്റ്റംസ്' എന്നാണ് വിളിക്കുന്നത്. ഈ ഘട്ടത്തില്‍ കടുത്ത തലവേദന, പെട്ടെന്നുണ്ടാകുന്ന ശക്തമായ പനി, സഹിക്കാനാകാത്ത ശരീരവേദന, പേശികളുടെ ബലഹീനത, കടുത്ത തൊണ്ടവേദന, കഠിനമായ ക്ഷീണം എന്നിവ അനുഭവപ്പെടും. എന്നാല്‍ രോഗം അടുത്ത ഘട്ടത്തിലേക്ക് കടക്കുന്നതോടെ ഇത് 'വെറ്റ് സിംപ്റ്റംസ്' ആയി മാറുന്നു. ഈ അവസ്ഥയില്‍ രോഗിക്ക് നിയന്ത്രിക്കാനാകാത്ത വിധം കടുത്ത ഛർദിയും വയറിളക്കവും ഉണ്ടാകുന്നു. ഇത് ശരീരത്തിലെ ജലാംശവും ലവണങ്ങളും പൂർണമായി നഷ്ടപ്പെടുത്തുന്ന മാരകമായ അവസ്ഥയിലേക്ക് വ്യക്തിയെ എത്തിക്കുന്നു.