അച്ഛന്റെ സിനിമയിൽ വീണ്ടും മകൾ

പുതിയ പൃഥ്വിരാജ് ചിത്രം ‘ഐ, നോബഡി’യിലെ ഏറ്റവും വലിയ സർപ്രൈസ് അണിയറപ്രവർത്തകർ പുറത്തുവിട്ടു. ജേക്സ് ബിജോയ്‌യുടെ സംഗീതത്തിൽ ചിത്രത്തിലെ ‘സർക്കസ്’ എന്ന ഗാനം ആലപിച്ചിരിക്കുന്നത് പൃഥ്വിരാജിന്റെ മകൾ അലംകൃത മേനോൻ പൃഥ്വിരാജ് ആണ്. ഗാനത്തിന്റെ ലിറിക് വീഡിയോ ഇപ്പോൾ പുറത്തിറങ്ങിയിട്ടുണ്ട്. കുട്ടിക്കാലം മുതലേ സംഗീതത്തിൽ അലംകൃതയ്ക്കുള്ള അഭിനിവേശം തിരിച്ചറിഞ്ഞാണ് ഈ ഗാനം നൽകിയതെന്നും, വളരെ അനായാസമായാണ് അവളത് പാടിത്തീർത്തതെന്നും സംഗീത സംവിധായകൻ ജേക്സ് ബിജോയ് സമൂഹമാധ്യമങ്ങളിൽ കുറിച്ചു. ഒരു ബാങ്ക് മോഷണത്തിന്റെ പശ്ചാത്തലത്തിൽ ഒരുങ്ങിയ ഈ ത്രില്ലർ ചിത്രത്തിൽ അച്ഛൻ നായകനായി സ്ക്രീനിൽ തിളങ്ങുമ്പോൾ, പിന്നണി ഗായികയായി മകളും ഇപ്പോൾ ആരാധകരുടെ കയ്യടി നേടുകയാണ്.